Panairi “E JONA” do të organizohet për herë të parë në vitin 2022, më 27-29 Korrik, në disa hapësira të qytetit të Gjilanit.
Ngjarja do të përmbajë në vete: Panair dhe B2B, panair shitës dhe B2C i pëcjellur me festë të birrës, me festë të verës, me ushqim dhe me koncert festiv për mirëseardhje të diasporës sonë dhe gjithë vizitorëve e mysafirëve të qytetit të Gjilanit.

E veçanta e këtij panairi është fokusimi tek kompanitë që do të vijnë nga katër shtetet fqinje të Kosovës duke i sjelle produktet dhe shërbimet e tyre, pra nga Shqipëria, Maqedonia e Veriut, Mali i Zi duke edhe përfshirë dhe Luginën e Preshevës dhe gjithashtu duke ftuar mysafirë nga mbarë diaspora jonë me origjinë shqiptare.

Synimi i panairit është që të shndërrohet në panair të përvitshëm, ku çdo vit do të synohet rritja e ekspozuesëve dhe mysafirëve, duke ndikuar kështu në rritjen ekonomike me fokus të veçantë në qytetin e Gjilanit por edhe regjionit të Anamoravës.

Qëllimi i panairit “E JONA” është që prodhuesit shqiptarë kudo që janë, ta kenë një vendtakim në të cilin do të njoftohen rreth veprimtarisë së njëri tjetrit dhe të ndërtojnë relacione bashkëpunimi për shkëmbimin dhe shpërndarjen e ndërsjellë të produkteve të veta në mbarë tregun shqiptar që përfshinë rreth 7 milion banorë. Gjithashtu, në panair do të jenë të ftuar në cilësinë e ekspozuesve dhe vizitorëve bizneset e diasporës shqiptare, të cilat janë shumë të interesuara për t’i eksportuar prodhimet shqiptare në shtetet e jashtme ku ata veprojnë.

Prodhuesit shqiptarë nga Shqipëria, Kosova, Maqedonia, Mali i Zi, Lugina e Preshevës dhe Diaspora, nga të gjitha fushat e prodhimtarisë, do të mblidhen në Gjilan për t’i ekspozuar produktet e veta para mijëra vizitorëve.
Përbrenda këtij projekti është paraparë që të organizohen paralelisht tri aktivitete të ndryshme por që ndërlidhen mjaft mirë njëra me tjetrën, të cilat janë: Panairi biznesor & B2B, Panair me karakter shitje dhe festë me koncert.